Sudip Roy Barman bai gwdaljak kaisni MLA rok Montri okra Biplab Deb bai montri achukthai ni seplejakmani ulo, tabuk juda BJP ni adongrok bai gwdalwi Delhi phaising koklam salaina thanglaijak. Barman bai Deb ni bisingo gwdalya ni kok kwbangma koktma rogo awaimung wngjak. Haiphano IANS bai swnghor jakmani yak ulo bo sakha, “ Ang khwna nogo kiphilwi tongo. Ang bai Biplab Kr. Deb ni halog kahamno. Nadda ji no khaphurma yapharna bagwi se Delhi o phaiyo hwnwi.”
Bisingni koktma manmani khe, BJP ni Kuchuk Adongrok luku bai taal kwrwi tongmungni jwngal patimungno pairwnani bagwi hwnwi. Haiphano, hasteni BJP adongrong borokni Delhi thangmungno kaham mokol bai nasikliya tei jora phaikhe bwskango swrai swrai sijaknai hwnwi.
Biplab Deb ni khachuksa borokni twi koktma saimanmani khe Montri okra o kokrokno rwgwi agi bo Delhi o koksalaijak. Haiphano kwtal biyal achaikha jephuru BJP ni kwtal central bodol o Biplab Deb ni yagra yak Ram Madhav, NorthEast naikolnai adong General Secretary achukthai ni seplejakmani ulo. Kebenglaijak MLA rok JP Nadda, GS (Organisation) BL Santosh tei Union Home Minister Amit Shah bai malailainani chaitonglai tongo hwnwi khwnakha. Biplab Deb ni ‘Chaya raida’ no twi jotono kok tisalaikha hwnwi awaimung wngwi tongkha.
Omono rwgwi hasteni BJP president chajakya wngmani kok tisakha. Tripura ni BJP president sakha, “ Chini party ni kaisa raida tongo, jephuru hasteni BJP raida swnamnairok (leaders) hasteni ni phataro thang, borok president no sawui thango. Ang saui manya borok Delhi o thangjak hwnwi. Kebo ano kok salangya. Koktmabwlaih o nwgwi saui mankha (borok ni sanmungni kok). O kok kubui hwnkhe belaino Chaya wngnai tei party ni raida twi borokno swngjaknai hwnwi”. Haiphano, borok hasteo kiphilna swkang kuno khaimangwlak khu tei koktmabwlaih no simi puto chawoi bo wnglak hwnwi sakha Mg. Saha.
Tabukswk jora ni patimungno naharkhe BJP ni bisingo kahamno hor chwnglaijak wngwi tongo.
New Delhi
Source: IANS Special by Anindya Banerjee