Tripura hasteo Covid-19 bemar manjagwi koktma thumnai Mg. Jitendra Debbarma ni langma chokha khumulwng sakham nogo. Mg. Jitendra Debbarma, omar 46 bisi ni nok wngkha Champaknagar ni Balaram Thakur para o. Bo Electronics Media Chini Khorang channel ni khoroksa kokthumnai tongmani. Salsni romwi no kulum manjagwi tongmani tei thangnai hor ni simi bini bukungwti thwi kulukma nukjakha. 20th, Oct, 2020 phungni 9.30 phaising Khumulwng sakham nok o tubujakhe puila no bono corona test khaijak kha tei Oxygen rwjakha, haiphano belai sak belmani bagwi bo oxygen kaham khe nai manliya. Corona test positive sijakmani ulo 11.45 am o bono Doctor thwikha hwni saklai kha.
Mg. Jitendra Debbarma kwdwkma joratwi no kokthum ma o rwgwi tongmani tei o hamya koktma bini logisong rokni khao o belaikhe khakham ma rwlangkha. Bo thwiphuru bini Hik tei khoroknwi sajwkno khibiwui kwlangkha. Paithago bono Balaram Thakur para ni simalwngo phobjakha covid-19 ni joto raida maniwoi.
Bini atumsa thwimani kotma haste gwnangwi wanamasingma khe nasikjakha. Bini kha ni borokrok tei hasteni montri okra Mg. Biplab Kumar Deb, MP Mgt. Pratima Bhowmik, Montri Mevar Kumar Jamtia tei teibo kwbangma lukurok kha khamma yaphar laikha.
COMMENTS