Tripura Medical College o swrwngmung khwlai MBBS Doctor wngnani bagwi Fee nangwi mano 54.5 Lakh ni se kwbang. 14 lakh rang bangrwjakha. Kwtal Fee ni raida swnamakha Permanent Admission Committee.
Teiwaisa Fee bangrwjak kha. Agi 2018 bisi o bangrwjakmani, tabuk teiwaisa bangrwjak phiokha. Tabuk kwtal swrwngna thangnairok 54.5 lakh rang ma rwnai. 2018-19 bisi o Fee tongmani 20.17 lakh rang.
Tripura hasteo BJP Sarkar phaimani 2.5 bisi wngkha, tabuksak jora Fee bangrwjak kha wainwi. BJP Sarkar phawui puila Fee bangrwjak phuru Assembly o kok kasakha. Kebengnai bodol CPI(M) sejama kok tisalaikha. Aphuru sakham montri tongmani Mg. Sudip Roy Barman. Kotmabwlaih rogo swijakha, Assembly o bo sakha NIT exam o saijak swrwngnairok rang kwrwi ni bagwi doctor pori manya, abohai wngwlak hwnwi. Nangkhe Sarkar college no sogwi khibinai hwnwi.
CPI(M) ni MLA Mg. Sudhan Das swibwailh rohormani ulo Sakham montri samani tongo, Supreme Court ni raida twi joto private medical college rokno kwcham high court ni judge ni naikolmungbai Fee no twi committee kha na nangnai hwnwi. Tripura Medical college bo o raida ni bisingo no khobjago. Sudhan sakha, Sarkar college ni committee no Fee bangrwya khaina bagwi dagina wngthwng hwnwi swrwngnai bodolrok koktisalaikha.
Koktisalaimabai mungsa wngna kwrwi. Agini tongmung yakarwi kaham phasing thangnani yak pholokdi. Koktisalaimung kaisa thwngrwngni sep, hwnwi sakha montri okra.
Fee bangrwjak mano twi koktisalaima khorang tabukbo swrwngnai bodolrokni thani nukjagwi tongo. Leftist student union, SFI ni Tripura secretary Mg. Sandipan Deb sakha, “Hakotor swrwngmung raida 2020 o swrwngthai o banik khaina bagwi lama phuarwi rwjakha. Tabuk Tripura hasteo doctor porina bagwi rang nangma nokha khujak. TMC o porina bagwi rang ma rwnai 54.5 lakh. MBBS porina bagwi o Fee bangrwjakmano kebengwi jotono khorang tisana nangnai. Hasteni BJP-IPFT Sarkar no sejamung yapharo.”
NSUI ni Tripura kasku-yakchu Mg. Samrat Roy o Fee bangrwjakmano kebengwi kok tisakha. Borok omono twi protest khainai hwnwi sakha.
Tripura hasteo o tei kaisa Sarkar bai naikoljak medical college wngkha Agartala Government Medical College. Aro porina bagwi rang nango bisi o 1.15 lakh hai.
Salthang Tripura ni MP Pratima Bhowmik Loksabha o koktisakha, Central ni phasingtwi TMC no kaisa AIIMS hai sakham nog swnamwi rwna bagwi. Aro thai tei nangmani joto no tongo. Tabuk TMC government undertaking o tongo hwnwi sakha bo.
COMMENTS